ཁྱེད་ཀྱི་གནས་ཡུལ་ནི།  མདུན་ཤོག > རྩོམ་རིག

རག་ར་རིན་པོ་ཆེར་དགེ་ཆོས་སྐོར་གྱི་བཅར་འདྲི་བྱས་བ།

སྤེལ་དུས། 2013-11-13 09:32:41  ཁུངས། ངེད་དྲ་བ།  རྩོམ་པ་པོ། ཤེས་རིག་གླིང་།  རྡེབ་ཚད། 

 ཡོང་ཁུངས། དགེ་ཆོས་དྲ་བ། བཅར་དྲི་བ་དང་པོ་དེར་རག་ར་རིན་པོ་ཆེ་དང་དགེ་ཆོས་གཉིས་བར་ཐོག་མར་འབྲེལ་བ་བྱུང་སྟངས་སྐོར་ལ་གསུངས་རོགས་གནང༌། འདྲི་བ། དཔལ་ལྡན་རྒྱལ། 

མཁས་དབང་དགེ་འདུན་ཆོས་འཕེལ་དང་ཁོང་གི་བརྩམས་ཆོས་སྐོར་ལ་རག་ར་རིན་པོ་ཆེ་མཆོག་གིས་ང་དང་མཉམ་དུ་བཀའ་མོལ་གནང་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུ། མཁས་དབང་དགེ་འདུན་ཆོས་འཕེལ་མཆོག་གི་གསུང་རྩོམ་དང་ལྟ་བ་སོགས་གང་ཅིའི་ཐད་མཁས་པ་གཞན་དང་མི་འདྲ་བའི་དམིགས་བསལ་གྱི་ཁྱད་ཆོས་ཞིག་ཐོན་ཡོད་སྟབས་མི་མང་པོ་ཞིག་གིས་དགེ་ཆོས་མཆོག་དང་ཁོང་གི་བརྩམམ་ཆོས་སྐོར་ལ་དོ་སྣང་ཇེ་ཆེར་འགྲོ་བཞིན་པ་རེད།
 
དྲི་བ་དང་པོ་དེར་རག་ར་རིན་པོ་ཆེ་དང་དགེ་ཆོས་གཉིས་བར་ཐོག་མར་འབྲེལ་བ་བྱུང་སྟངས་སྐོར་ལ་གསུངས་རོགས་གནང༌། 
རག་ར་རིན་པོ་ཆེ། འདིའི་སྐོར་ལ་ཞུ་དགོས་བྱུང་ན། ང་དགོན་པར་འཛུལ་དུས་དགེ་འདུན་ཆོས་འཕེལ་ལགས་འབྲས་སྤུངས་ལ་ཕེབས་འདུག དེའི་སྒང་ལ་དབུ་མ་རྙིང་བ་བར་དུ་འབྲས་སྤུངས་ལ་བཞུགས་འདུག་ལ༌། ཁོང་རིག་པ་ཡག་པོ་ཡོད་པ་དང༌། འཛིན་གྲྭ་ནང་རྩོད་པའི་ཕྱོགས་ལ་སྐད་གྲགས་ཆེན་པོ་ཡོད་པ་མ་ཟད།སྐབས་དེར་དགེ་འདུན་ཆོས་འཕེལ་ལགས་ཀྱི་མཛད་པ་རྣམ་གསུམ་མང་ཤོས་ནང་ནས་ང་ཁོང་ལ་མཇལ་རྒྱུའི་རྒྱུ་མཚནརྩ་བ་དེ་ནི། ང་རྒྱ་གརདུ་བསྡད་དུས་ཁོང་གིས་བྲིས་པའི་རྒྱ་གར་གྱི་གནས་ཡིག་ལ་མཇལ་དུས་ང་རང་དགེ་འདུན་ཆོས་འཕེལ་ལགས་ལ་མཇལ་འདོད་ཆེན་པོ་བྱུང༌། 
 
དཔལ་ལྡན་རྒྱལ། དགེ་འདུན་ཆོས་འཕེལ་འབྲས་སྤུངས་དགོན་པར་བཞུགས་དུས་ཁོང་ལ་སྙན་གྲགས་ག་འདྲ་ཡོད་པ་རེད།
རག་ར་རིན་པོ་ཆེ། སྐབས་དེར་དགེ་འདུན་ཆོས་འཕེལ་ལགས་ལ་སྙན་གྲགས་གཉིས་འདུག རིག་ལམ་ཐོག་ལ་ཧ་ལས་པའི་རིག་པ་ཡག་པོ་ཡིན་པ་གཅིག་དང༌།
 
 
 
གཉིས་པ་དེ་རི་མོ་ཕྱོགས་ལ་མཁས་པ་ཡིན་པ་དེ་གཉིས་ང་རང་དགོན་པ་ན་ཡོད་དུས་གྲགས་ཆེན་པོ་འདུག དེ་དུས་དགེ་འདུན་ཆོས་འཕེལ་ལགས་ཀྱི་མིང་གོ་མྱོང་བ་མ་གཏོགས་ང་ཁོང་ལ་མཇལ་གྱི་རེད་བསམ་པ་དང༌།དཔེ་ཆ་ཁྲིད་ཀྱི་རེད་ཁྱོན་ནས་བསམ་མེད། 
དཔལ་ལྡན་རྒྱལ། རིན་པོ་ཆེ་དགེ་འདུན་ཆོས་འཕེལ་ལ་ཐེངས་དང་པོ་ཇི་ལྟར་འཇལ་བ་དང༌། དེ་ནས་རིན་པོ་ཆེ་ཡིསདགེ་ཆོས་མདུན་དུ་དཔེ་ཆ་ཁྲིད་པའི་གོ་སྐབས་བྱུང་ཡོད་པ་བཞིན་ཁྱེད་གཉིས་བར་ལ་དགེ་སློབ་ཀྱི་འབྲེལ་བ་བྱུང་སྟངས་སྐོར་ཅིག་གསུངས་རོགས། 
རག་ར་རིན་པོ་ཆེ།ལོ་མང་པོ་ཞིག་གི་རྗེས་ནས་ང་རྒྱ་གར་ནས་ཕྱིར་ཡོང༌། དེ་ནས་ང་རང་རིག་གནས་ལ་དོ་སྣང་སླེབས་པ་རེད། སྐབས་དེར་ཧོར་ཁང་དགེ་བཤེས་ལགསཀྱིད་སྐད་གཉིས་ཤན་སྦྱར་རྩོམ་གྱི་ཡོད་པ་དང༌། ཁོང་གིས་དགེ་འདུན་ཆོས་འཕེལ་གྱི་ཁྱདཆོས་མང་པོ་གསུངས་ཀྱི་འདུག ང་རང་ཡང་དགེ་འདུན་ཆོས་འཕེལ་ལ་མཇལ་འདོད་ཆེནཔོ་བྱུང༌། དེ་ནས་དགེ་འདུན་ཆོས་འཕེལ་འབྲུག་ཡུལ་བརྒྱུད་ལྷ་སར་ཕེབས་པ་རེད།དེ་དུས་ང་རང་ཧ་ཅང་དགའ་བོ་བྱུང༌། ང་རང་ཁོང་གི་ཁྱིམ་ལ་མཇལ་དུ་སོང་བ་ཡིན། ལྷ་ས་དབང་འདུས་སྤེན་པ་ཟེར་བ་དེ་རེད། ངས་ཁོང་རིག་གནས་མཁས་པ་ཡིན་པ་དང་ཁོང་གི་མཁྱེན་ཡོན་མང་པོ་འཇལ་ནས་དེ་དུས་ངེད་གཉིས་འགོ་བཙུགས་ཡག་པོ་བྱུང་སོང༌། སྐབས་དེར་དགེ་འདུན་ཆོས་འཕེལ་རིག་གནས་མཁས་པ་ཡིན་པ་སྐད་གྲགས་ཆེན་པོ་འདུག དེ་ནས་ངས་འདི་ཞུས་པ་ཡིན། ལྷ་སར་ཕེབས་པ་དང་ལམ་སེང་ང་ལ་རིག་གནས་སྐོར་དེ་འདྲ་མང་པོ་ཞིག་ཁྲིད་རོགས་གནང༌། དེ་ཁོ་རང་གིས་ལམ་སེང་དགའ་བོ་གནང་ནས་དེ་ལྟར་བྱེད་དགོས་གསུངས་སོང༌། དེ་ནས་བཟུང་ང་ཚོ་ཕན་ཚུན་ངོ་ཤེས་པ་རེད། དཔལ་ལྡན་རྒྱལ། དགེ་འདུན་ཆོས་འཕེལ་མཆོག་གིས་མཁས་པ་གཞན་དང་མི་འདྲ་བའི་བརྩམས་ཆོས་ཐུན་མོང་མ་ཡིན་མང་པོ་ཞིག་ང་ཚོ་ལ་བཞག་ཡོད་པ་རེད། དེར་བརྟེན་དེང་སྐབས་འཛམ་གླིང་འདིའི་སྒང་དུ་བོད་ཀྱི་རིག་གཞུང་ལ་དོ་སྣང་བྱེད་མཁན་རྣམས་ཀྱིས་དགེ་འདུན་ཆོས་འཕེལ་མཆོག་གི་བརྩམས་ཆོས་དང༌། སྐུ་ཚེའི་ལོ་རྒྱུས་སྐོར་ལ་དོ་སྣང་བྱེད་མཁན་མང་ནས་མང་དུ་འགྲོ་བཞིན་ཡོད་པ་རེད། རིན་པོ་ཆེའི་དགོངས་ཚུལ་ལ་དགེ་འདུན་ཆོས་འཕེལ་གྱི་བརྩམས་ཆོས་ལ་དམིགས་བསལ་གྱི་ཁྱད་ཆོས་ག་འདྲ་ཞིག་ཡོད་པ་རེད།
རག་ར་རིན་པོ་ཆེ། དཔེར་ཆ་བཞག་ན། དགེ་འདུན་ཆོས་འཕེལ་གཞན་དང་མི་འདྲ་བའི་ཡར་ཐོན་ཞིག་ལ་ཆ་འཇོག་གི་ཡོད་པ་རེད། དེ་ཧ་ལམ་ང་ཚོ་བོད་ཀྱི་རིག་གནས་ཡོད་ན་མེད་ན། བོད་ཀྱི་རིག་གནས་དང་པོ་སང་་སི་སྐད་ནས་བོད་ཡིག་ནང་བསྒྱུར་དགོས་ཡོད་པ་དེ་རེད། དེ་འདྲའི་ང་ཚོའི་བོད་ཡིག་དང་སམ་སྐྲི་སྐད་བར་ལ་འབྲེལ་བ་ཡོད་པའི་རྗེས་སུ་མི་རབས་མང་པོ་ཞིག་གི་ནང་དགེ་འདུན་ཆོས་འཕེལ་ལགས་དལ་པཎི་ར་ཧུ་ལ་གཉིས་ཀྱི་ལས་ཀ་བྱས་པ་ནང་བཞིན་བྱུང་བ་ཞིག་ང་ཚོའི་མི་རབས་གསུམ་བཞིའི་ནང་སུ་གཅིག་གིས་ཀྱང་བྱས་མི་འདུག ང་རྒྱ་གར་དུ་བསྡད་དུས་རྒྱ་གར་གྱི་རིག་གནས་དང་དགེ་འདུན་ཆོས་འཕེལ་ལགས་ཀྱི་དེ་དག་ལ་བལྟས་ནས་ང་ཚོའི་སྔ་མོའི་ལོ་ཙྭ་བ་རྣམས་ཀྱི་གནང་སྟངས་དང་དགེ་འདུན་ཆོས་འཕེལ་གྱི་གནང་སྟངས་རྣམས་འདྲ་བོ་མཐོང་ནས་ང་རང་དེ་ལ་ཧ་ཅང་རྗེས་སུ་ཡི་རངས་བྱུང་ནས་ང་ཁོང་གི་ཞབས་ལ་གཏུགས་པའི་རྒྱུ་མཚན་དེ་ལ་ཐུག་ཡོད།
དཔལ་ལྡན་རྒྱལ། དགེ་འདུན་ཆོས་འཕེལ་མཆོག་ང་ཚོའི་བོད་གངས་ཅན་གྱི་རིག་གནས་གཅིག་བུར་མགོ་འཁོར་ནས་མ་བསྡད་པར་འཛམ་གླིང་མི་རིགས་གཞན་གྱི་རིག་གནས་ལ་དོ་སྣང་བྱས་ནས་ཁོང་གི་བརྩམས་ཆོས་ལ་བོད་ཀྱི་མཁས་པ་གཞན་དང་མ་འདྲ་བའི་དམིགས་བསལ་གྱི་ཁྱད་ཆོས་ཞིག་སླེབས་ཡོད་པ་རེད། རིན་པོ་ཆེའི་དགོངས་ཚུལ་ལ་དམིགས་བསལ་གྱི་ཁྱད་ཆོས་གང་ཡོད་ཁོང་གི་སྐུ་ཚེ་དང་འབྲེལ་བའི་སྒང་ནས་གསུང་རོགས་གནང་དང༌། རག་ར་རིན་པོ་ཆེ། ཁོང་གིས་དཀའ་ལས་མང་པོ་བསྐྱོན་ནས་རྒྱ་གར་དུ་བཞུགས་པ་རེད། དཀའ་ལས་བསྐྱོན་ནས་བཞུགས་པ་དེ་ཕལ་ཆེར་མི་རབས་མང་པོ་ཞིག་ལ་བོད་དང་རྒྱ་གར་བར་གྱི་རིག་ལམ་དེ་ལ་ཞིབ་འཇུག་བྱེད་མཁན་ཁྱོན་ནས་མ་བྱུང་བ་དང༌། ཁོང་གི་ས་ཞིབ་འཇུག་གནང་ཏེ། བོད་ལ་བསྐྱར་དུ་ཕན་མི་ཡོང་ངམ་དགོངས་འདུག རྒྱུ་མཚན་དེ་ལ་བརྟེན་ནས། དཔེར་ན། ཁྱེད་རང་གིས་གཟིགས་ཡོད་རྒྱུ་རེད། ལོ་རྒྱུས་གསེར་གྱི་ཐང་མ། ར་མ་ན། བོད་དང་རྒྱ་གར་བར་གྱི་འབྲེལ་བ་ཡོད་པའི་སྤྱོད་འཇུག་མདོ་སྔགས་མང་པོ་ནང་གི་རྩ་བ་དེ་དག་གནང་འདུག ཕལ་ཆེར་དེ་འདྲ་གནང་མཁན་སུ་ཡང་མ་བྱུང་སྟབས། བོད་ནང་གི་བོད་པ་རྣམས་མི་རབས་མང་པོ་ཤིག་ལ་ཕྱི་རོལ་ལ་འབྲེལ་བ་མ་བྱུང་བར་བོད་ནང་གི་རིག་གནས་རྐྱང་རྐྱང་ལ་གཟིགས་པ་རེད། དགེ་འདུན་ཆོས་འཕེལ་ལགས་ཀྱིས་ཧོབ་ཏེ་ང་ཚོར་འདི་འདྲའི་འབྲེལ་བནའདུག་ཟེར་དུས། ཁོང་ཚོ་འདྲོགས་པ་ལྟར་བྱུང་བ་རེད་མ་གཏོགས། དགེ་འདུན་ཆོས་འཕེལ་ལགས་ཀྱིས་སྔ་མོ་དེ་དག་མ་འགྲིགས་པ་རེད་གསུངས་ཀྱི་ཡོད་པ་མ་རེད། ཧ་ལམ་ང་ཚོར་དེ་འདྲའི་གོ་ལོག་ཐེབས་ཡོད་པ་རེད། ང་རང་རྩ་བའི་དགེ་འདུན་ཆོས་འཕེལ་ལགས་ལ་ཡིད་ཆེས་གནང་བ་དེ་ག་རེ་ཐོག་ནས་བྱུང་བ་རེད་ཟེར་ན། དགེ་འདུན་ཆོས་འཕེལ་རིག་གནས་ཐོག་ལ་སྐད་གྲགས་ཆེན་པོ་ཡོད་པ་རེད། ང་རང་ངོས་ནས་རིག་གནས་ཐོག་སྐྱབས་འཇུག་ཞུས་པ་ཡིན། རིག་གནས་སྙན་སུམ་ཐོག་ལ་བཀའ་ཁྲིད་གནང་རོགས་ཞུས་དུས། ཁོང་གི་ཧོབ་ཏེ་སྙན་སུམ་ཁྲིད་ནས་རིག་གནས་ཤེས་པ་ཡོད་པ་མ་རེད། ང་ཚོ་བོད་ཀྱི་རིག་ལ་རིགས་མང་པོ་ཡོད་པ་རེད། རྒྱལ་རབས་དང༌། རྟོགས་བརྗོད་སོགས་བསླབ་དེ་ནས་གཞི་ནས་རིག་གནས་ཁྲིད་དགོས་འདུག་ཅེས་གསུངས་ནས་ང་རང་ལ་རིག་གནས་སློབ་པའི་བསམ་བློ་དེ་ལྟར་འཁོར་བ་རེད།
དཔལ་ལྡན་རྒྱལ། རིན་པོ་ཆེ་དགེ་འདུན་ཆོས་འཕེལ་རྒྱ་གར་ལ་ཕེབས་ཏེ་ཕྱི་རྒྱལ་མཁས་པ་མང་པོ་ཞིག་ལ་འབྲེལ་བ་བྱུང་ཡོད་པ་འདྲ། དེ་འདྲའི་འབྲེལ་བ་བྱུང་དུས་ལས་ཀ་དང་ཁོང་ཚོས་བྱེད་སྟངས་ལ་ཕལ་ཆེར་བློ་ཕམ་བྱུང་ཡོད་པ་འདྲ། དཔེར་ན་ཁོང་གིས་སྙན་རྩོམ་ཞིག་གི་འདི་ལྟར་བྲིས་འདུག། གཞན་ཕན་སྙིང་རྗེ་སྣུམ་དང་བྲལ་ན་ཡང༌། རིག་རྩལ་ཐབས་མཁས་གློག་གི་ཆོ་འཕྲུལ་གྱིས། ། དྲང་པོ་མི་ལ་འཁྱོག་པའི་ལམ་སྟོན་པ།། སྐྲ་སེར་སྤྲེའུ་རིགས་ལ་དོགས་ཟོན་མཛོད། ཞེས་པ་དེ་ལ་བལྟ་དུས་ཕལ་ཆེར་ཕྱི་རྒྱལ་གྱི་མཁས་པ་གཞན་དག་དང་མཉམ་དུས་ཁོང་ལ་འདོད་བློ་མ་ཁེངས་དང་དྲང་པོ་མ་བྱས་འདྲ་བོའི་དགོངས་ཚུལ་ཞིག་ཐོན་འདུག། དེའི་སྐོར་རིན་པོ་ཆེས་གསུང་རོགས།
རག་ར་རིན་པོ་ཆེ། དེ་ཕལ་ཆེར་ལམ་སེང་བཤད་ཁག་པོ་འདྲ་བོ་འདུག ཡིན་ནའང༌། ཕྱི་རྒྱལ་གྱིས་མི་རྣམས་ཀྱིས་དགེ་འདུན་ཆོས་འཕེལ་ལགས་ཡོན་ཏན་ཅན་ཡིན་པ་ཤེས། དེ་ནས་དགེ་འདུན་ཆོས་འཕེལ་ལགས་ལ་གནས་ཚུལ་མང་པོ་བཀའ་འདྲི་བྱས་འདུག། དགེ་འདུན་ཆོས་འཕེལ་ལགས་གྱིས་གང་ཤེས་པ་དེ་མར་ལབ་འདུག། ཁོང་གིས་དེ་ལྟར་ལབ་དགོས་པ་ནི་ཁོང་ལ་ཕྱག་རོགས་བྱས་ནས་རང་གིས་བོད་ཀྱི་རིག་གནས་སྐོར་ལ་ཕྱག་ལས་གནང་པར་རོགས་རམ་ཞིག་ཨེ་ཡོང་བསམ་ཡོད་པ་འདྲ། རོགས་རམ་ཟེར་དུས་དགེ་འདུན་ཆོས་འཕེལ་ལགས་ལ་རིག་པ་དང༌། བསམ་བློའི་རོགས་པ་དགོས་པ་མ་རེད། ཕྲན་ཙམ་དཔལ་འབྱོར་གྱི་རོགས་པ་ཡོང་བ་ལ་དགོངས་པ་བཞེས་པ་མིན་ནམ། དེ་ལ་ཁོང་ཚོས་གང་ཡང་བྱས་མི་འདུག ཁོང་ནས་ཉན་ཡ་དེ་ཉན། ཐོ་རྒྱག་དགོས་པ་དེ་ཚོ་ཐོ་རྒྱབ། དགེ་འདུན་ཆོས་འཕེལ་ལགས་ཀྱིས་གནང་འདོད་ཡོད་པ་དེ་ལ་ཕྱི་རྒྱལ་མི་ཡིས་རོགས་པ་བྱེད་མ་ཐུབ་དང༌། དགེ་འདུན་ཆོས་འཕེལ་གྱི་སྐུ་ཡོན་དེ་ལ་ཡོན་ཏན་རང་གཤིས་ཡོད་པ་དེ་ཧ་མ་གོ དེ་འདྲའི་ཅིག་གིས་ཕྱོགས་གཉིས་ཆ་ནས་ལུས་བསྡད་ཡོད་པ་མ་གཏོགས༌། ཕྱི་རྒྱལ་ཁྱད་མཚར་ཨེ་ཡིན་བསམ་གྱི་འདུག དཔལ་ལྡན་རྒྱལ། འཛམ་གླིང་སྒང་སྤྱི་ཚོགས་གང་འདྲ་ཞིག་ཡིན་ནའང༌། རྩོམ་པ་པོ་དང་བསམ་བློ་གསར་བ་གཏོང་ཐུབ་མཁན་བྱུང་བ་ཡིན་ན། ག་དུས་ཡིནཡང་སྤྱི་ཚོགས་ཀྱིས་ངོས་ལེན་བྱེད་མ་ཐུབ་པའི་དཀའ་ངལ་ཞིག་ཡོང་གི་ཡོད་པ་བཞིན། དགེ་འདུན་ཆོས་འཕེལ་ལ་ཡང་དེ་འདྲ་དཀའ་ངལ་འཕྲད་དེ། བོད་ཀྱི་སྤྱི་ཚོགས་ཀྱིས་ཁོང་གི་བསམ་བློ་དང་ལྟ་བ་བློ་ངོར་མ་གཤོངས་བའམ། ཡང་ན་དང་ལེན་བྱེད་མ་ཐུབ་པའི་དབང་གིས་ཁོང་ལ་ཁེར་རྐྱང་ཡིན་པའི་སྣང་བ་ཞིག་བྱུང་ཡོད་པ་འདྲ། དཔེར་ན་ཁོང་གི་སྙན་རྩོམ་ཐོར་བུ་ཞིག་ཏུ།ཕྲག་དོག་ཁྲག་གིས་མྱོས་པའི་ཨུ་ཚུགས་སྟག། འཇིགས་པའི་ང་རོ་སྒྲོགས་པའི་ཚང་ཚང་ནང༌།། གཅིག་པུར་ལུས་པའི་བདེན་པའི་བུ་ཆུང་ང༌། ། ཤེས་རབ་ཅན་གྱི་སྙིང་རྗེ་ཡུལ་ཏུ་དགོངས། ཞེས་པ་དེ་བལྟ་དུས་ཁོང་ལ་ཁེར་རྐྱང་ཡིན་པའི་ཚོར་བ་ཤུགས་དྲག་པོ་འབྱུང་ཡོད་པ་བསམ་གྱི་འདུག། སྐབས་དེའི་སྤྱི་ཚོགས་ཀྱི་གནས་སྟངས་འོག་དེ་འདྲའི་ཚོར་བ་སྐྱེས་དགོས་པའི་སྐོར་ལ་རིན་པོ་ཆེས་གསུང་རོགས་གནང༌།
རག་ར་རིན་པོ་ཆེ། དེ་ངས་གསལ་བོར་ཞུ་ཐུབ་གྱི་འདུག གང་ཡིན་ཟེར་ན། ཁོང་གིས་ལོ་བཅུ་གཉིས་རིང་སྐུ་ལས་བསྐྱོན་པ་དེ། བར་སྐབས་ཤིག་ལ་བོད་དང་རྒྱ་གར་བར་ལ་འབྲེལ་བ་ཁྱོན་ནས་མ་བྱུང་བ་རེད། དེ་ལྟར་རྒྱ་གར་གྱི་གནས་ཚུལ་དང༌། མཁས་པ་བཅས་ལ་གོ་རྟོགས་དང་ངོ་ཤེས་འདྲ་འབྱུང་ཨེ་ཐུབ། དེ་འདྲའི་དགེ་འདུན་ཆོས་འཕེལ་ལགས་ལ་མཐོང་ཚུལ་བྱུང་འདུག ཡིན་ནའང་དགེ་འདུན་ཆོས་འཕེལ་གྱི་ལོ་ངོ་བཅུ་གཉིས་རིང་ཕྱག་ལས་གནང་པ་དེ་ད་ལྟ་བོད་ནས་འདོན་པའི་དེབ་དེ་ཚོ་ལགཟིགས་ན། དེ་ཚོས་ཁ་གྲགས་ཡོང་གི་རེད། ཕྱག་ལས་དེ་འདྲ་གནང་ཐུབ་མཁན་དེང་སང་སུ་གང་ཡང་བྱུང་ཡོད་པ་མ་རེད། དགེ་འདུན་ཆོས་འཕེལ་ཀྱིས་དཀའ་ལས་དེ་འདྲ་ཞིག་བསྐྱོན། བཙོན་ཁང་ནང་ནས་དཀའ་ལས་མྱོང༌། དེ་ནས་བཙོན་ཁང་ནས་ཐོན་ཡོང་དུས། དགེ་འདུན་ཆོས་འཕེལ་ལགས་ཀྱིས་བརྩམས་གནང་བ་དེ་དག་སུས་ལག་པར་ཡོད། སུས་ཉར་ཡོད་ཁྱོན་ནས་ཧ་གོ་ཡོད་པ་མ་རེད། ངས་བསམ་པར་དེ་དག་ཚང་མ་མེད་པར་ཆགས་པ་རེད་བསམས་ནས་མ་དགའ་བ་ཆེན་པོ་དང༌། སྡུག་བསྔལ་ཆེན་པོ་བྱུང་སོང༌། ངས་ལོ་འདི་དག་ལ་ད ཀའ་ལས་རྒྱབ་པ་ཚང་མ་མེད་པར་ཆགས་སོང་དགོངས་པ་བྱུང་ཡོད། གང་ལྟར་ཉིན་ཁ་ཤས་རྗེས་ང་ཁོང་ལ་མཇལ་དུས་ངས་འདི་ཞུས་པ་ཡིན། ཁྱེད་རང་དཀའ་ལས་དེ་འདར་བསྐྱོན་པ་རེད། བཙོན་ཁང་ནང་དུ་ཕེབས་ནས་དཀའ་ལས་འདི་འདྲ་ཞིག་གནང་བ་རེད། ང་རང་ཧ་ཅང་བློ་ཕམ་བྱུང་ཟེར་དུས། ཁོང་མཁས་པ་ནི་མཁས་པ་རང་རེད། ང་ལ་འདི་གསུངས་ཀྱི་འདུག། ཁྱེད་རང་གིས་སེམས་ཁྲེལ་མ་བྱེད། ལུང་བ་ཁ་བྱང་བལྟ་ཞིག་གི་ནང་མེ་ཏོག་སྙིང་རྗེ་བོ་ཞིག་སྐྱེས་པ་རེད། མེ་ཏོག་དེ་ལ་མིག་བལྟ་མཁན་མ་བྱུང་བ་རེད། མེ་ཏོག་དེ་ལ་དྲི་མ་སྣོམ་མཁན་མ་རེག་པ་རེད། ཁོང་ལུང་བ་ཁ་བྱང་དེ་རུ་སྐམ་སོང་བ་རེད། ངའི་གནས་ཚུལ་དེ་འདྲ་ཞིག་ཡིན། ང་ལ་དེ་གསུངས་སོང༌། ཁོང་གིས་མཐའ་ཚིག་ཟེར་ན་རྗེས་རྗེས་དེ་དེ་རེད།
དཔལ་ལྡན་རྒྱལ། སྐབས་དེར་དགེ་འདུན་ཆོས་འཕེལ་ལགས་བཙོན་ཁང་ནང་དུ་འཇུག་དགོས་པའི་གནས་སྟངས་གང་འདྲ་ཞིག་ཆགས་ཡོད་པའི་སྐོར་ལ་འགྲེལ་བརྗོད་ཅིག་གནང་རོགས། 
རག་ར་རིན་པོ་ཆེ། བཙོན་ཁང་དུ་འཇུག་དགོས་པ་དེ་དང་པོ་ཁོང་ཚོ་སྤོ་མདའ་ཚང་ཨ་བོ་རབ་དགའ་དང་ཁོང་ཚོ་ལ་རྙོག་དྲ་ཞིག་འདུག་པ་དེའི་ཐོག་ནས་རེད། དེ་དུས་བོད་དུ་ཁོང་ཚོས་འདི་ལབ་པ་རེད། དགེ་འདུན་ཆོས་འཕེལ་ལགས་ཀྱིས་དངུལ་ལོར་རྫུན་མ་བཟོ་རྒྱུ་བྱས་པ་རེད།རྒྱ་གར་དུ་རྫུན་མ་བཟོས་པ་རེད། དེ་ལ་ཁག་བཞག་ནས་བཙོན་ཁང་དུ་བཅུག་སོང༌། རྗེས་སུ་ཕར་བྱས་ཚུར་བྱས་དགེ་འདུན་ཆོས་འཕེལ་ལགས་གུང་ཁྲན་རེད་ཟེར་བ་མ་ཟད། ང་དང་ངའི་གཉེན་ཉེ་དགེ་འདུན་ཆོས་འཕེལ་གྱི་ཕྱག་ཏུ་ཡོད་པའི་དེབ་དེ་ཚོ་བལྟ་རུ་ཕྱིན་པ་རེད་ཟེར་བའི་སྐད་ཞིག་དཀྲོགས་པ་རེད། དེ་དུས་ངས་གུང་ཁྲན་ཟེར་བ་ག་རེ་ཡིན་མིན་ཤེས་ཀྱི་མེད། དེ་འདྲའི་ལྟ་བའི་སྐོར་ལ་གང་ཡང་ཤེས་ཀྱི་མེད། ཡིན་ནའང་ཁོང་ཚོས་དེ་འདྲའི་སྐད་ཆ་དཀྲོགས་ནས་དགེ་འདུན་ཆོས་འཕེལ་ལགས་གུང་ཁྲན་ཡིན་པའི་རྒྱུ་མཚན་མང་པོ་བཀོད་པ་རེད།
དཔལ་ལྡན་རྒྱལ། དགེ་འདུན་ཆོས་འཕེལ་སྐབས་དེའི་བོད་ཀྱི་སྤྱི་ཚོགས་ཁྲོད་དུ་མི་རིགས་དང༌། རང་གི་རྒྱལ་ཁབ་ལ་བསམ་བློ་གཏོང་མཁན་དང༌།ཤ་ཞེན་ཡོད་པའི་མཁས་དབང་ཞིག་ཡིན་པ་མ་ཟད། ཁོང་རྒྱ་གར་ལ་ཕེབ་ནས་རྒྱ་གར་གྱི་ཆབ་སྲིད་ཀྱི་འགྲོ་སྟངས་ལ་མཁྱེན་རླབས་ཡོད་པ་དང༌། སྤྱིར་བཏང་ནུབ་ཕྱོགས་སྤྱི་ཚོགས་ཀྱི་འགྲོ་སྟངས་ལའང་མཁྱེན་རྒྱ་ཅུང་ཡོད་པ་རེད། དེར་བརྟེན་ཁོང་ལྷ་སར་ཕེབས་དུས་བོད་སྤྱི་ཚོགས་ཀྱི་གནས་སྟངས་དང༌། ཆབ་སྲིད་ཀྱི་ལམ་ལུགས་སོགས་ལ་ཏན་ཏན་བསམ་བློ་ཞིག་བཏང་ཡོད་རྒྱུ་རེད། དེ་དུས་དགེ་འདུན་ཆོད་འཕེལ་གྱིས་བསམ་ཚུལ་ག་འདྲ་ཞིག་འཁྱེར་གྱི་ཡོད་པ་རེད་དམ། 
རག་ར་རིན་པོ་ཆེ། ངས་ཤེས་པ་དེ་དགེ་འདུན་ཆོས་འཕེལ་ལགས་ནང་བ་རྣམ་པར་དག་པ་ཞིག་ཡིན་པ་ཤེས་ཀྱི་ཡོད། དེའི་རྒྱུ་མཚན་ནི་དགེ་འདུན་ཆོས་འཕེལ་ལགས་ཀྱི་བརྩམས་གནང་བའི་དེབ་དེ་དག་ལ་གཟིགས་དང༌། སངས་རྒྱས་ཀྱི་གནས་ཆེན་སྐོར་ཀྱི་དེབ་དེ་གཟིགས་དང་སངས་རྒྱ་བཅོམ་ལྡན་འདས་ལ་དད་པ་ག་ཚོད་ཡོད་མེད་དེ་ག་རང་ནས་ཧ་གོ་བ་འདུག ངས་མང་པོ་བཤད་དགོས་པ་མི་འདུག དེ་འདྲའི་ཧ་ལས་དགོས་ང་ཚོའི་མཁས་གྲུབ་སུ་གང་གིས་བརྩམས་ཐུབ་ཡོད་པ་མ་རེད།
དཔལ་ལྡན་རྒྱལ། སྐབས་དེར་དགེ་འདུན་ཆོས་འཕེལ་ལྟ་བ་ལོག་པ་རེད་ཟེར་བ་དང༌། གུང་ཁྲན་རེད་ཟེར་བ་སོགས་སྐྱོན་འཛུགས་མང་པོ་བྱས་ཡོད་པ་རེད། སྤྱིར་བཏང་ང་ཚོའི་བོད་ཀྱི་སྤྱི་ཚོགས་ཁྲོད་དུ་ལྟ་བ་གསར་བ་ཞིག་དང༌། སྔོན་བྱོན་མཁས་དབང་རྣམས་ཀྱི་གསུང་མ་མྱོང་བའི་ཞིག་གསུངས་བ་ཡིན་ན། དེ་འགོག་ཐབས་བྱེད་པ་དེ་ང་ཚོའི་བོད་ཀྱི་མཁས་དབང་མང་པའི་གཤིས་ཀ་ཆགས་ཡོད་པ་འདྲ་བོ་མཐོང་གི་འདུག རྩ་བའི་དགེ་ཆོས་མཆོག་གིས་བརྩམས་ཆོས་དེ་དག་ཀློག་སྐབས། ཁོང་གི་བརྩམས་ཆོས་དག་ལ་བོད་ཀྱི་སྤྱི་ཚོགས་དང༌། མཁས་དབང་ཁག་ཅིག་རྒྱུས་ལོན་བྱེད་མ་ཐུབ་པའི་དབང་གིས་ཁོང་ལ་དཀང་ངལ་ཞིག་འཕྲད་པ་འདྲ། སྐབས་དེར་དགེ་ཆོས་མཆོག་གིས་བོད་མི་རིགས་དང་རྒྱལ་ཁབ་ལ་ཁ་ཚ་དགོས་གཏུགས་གི་དགོངས་པ་ག་འདྲ་ཞིག་བཞེས་ཡོད་པ་རེད་བསམ་གྱི་འདུག
རག་ར་རིན་པོ་ཆེ། སྐབས་དེར་དགེ་འདུན་ཆོས་འཕེལ་ལགས་ཀྱིས་རྩ་ཆེ་ཤོས་དེ་བོད་ཀྱི་རིག་གནས་དང༌། རྒྱ་གཞུང་བོད་གཞུང་སྐོར་རེད།དེ་ངས་ཏག་ཏག་ཤེས་ཀྱི་ཡོད། སྲིད་དོན་ཀྱི་སྐོར་ལ་ཁོང་གི་ཐུགས་བློ་ནི་ང་ཚོ་རྗེས་ལུས་ཐེབས་ཡོད་པ་ཞིག་ལ་ཏན་ཏན་ཐུགས་སེམས་གནང་གི་འདུག དེ་དུས་ང་ཚོ་གཞོན་གཞོན་རེད། སྐབས་དེར་དགེ་འདུན་ཆོས་འཕེལ་ལགས་ལ་ང་ཚོ་བོད་ཡར་རྒྱས་འགྲོ་བར་ཅི་འདྲ་བྱས་ན་དགའ་ཞེས་བཀའ་འདྲི་ཞུས་དུས། ང་ལ་ནི་དེ་ཁག་པོ་རེད་གསུངས་སོང༌། སྲིད་དོན་ཡར་རྒྱས་འགྲོ་བ་དང་ང་ཚོའི ལུང་བ་དེ་ཉིན་མ་གཅིག་ལ་བརྗེ་བོ་རྒྱག་རྒྱུ་ཁག་པོ་རེད། སྲིད་དོན་ཡར་རྒྱས་འགྲོ་བར་སྔོན་ལ་འགྱུར་ལྡོག་དང་འཇིགས་པ་ཧ་ལས་པ་ཞིག་མ་བྱུང་བར་དུ་ང་ཚོའི་གནས་ཚུལ་འདིར་འགྱུར་བ་འགྲོ་ཐུབ་ཀྱི་མ་རེད། དེ་ལས་སྔོན་ལ་ཁྱོད་ཀྱིས་དཔེ་ཆ་ཡག་པོ་བལྟས། དེ་ནས་རྒྱ་གར་ལ་ཕྱིན༌། སཾ་སྐྲིཊ་སྐད་ཅུང་སྦྱངས་རྒྱུ་དང༌། རིག་གནས་ལ་སྦྱོང༌། རིག་གནས་ཟེར་བ་དེ་དེང་སང་བོད་ལ་ཉམས་པའི་གནས་སྐབས་རེད། དེང་སང་མང་ཆེ་བ་ལྟ་བ་དང༌། སྒོམ་པ། སྤྱོད་པའི་ཐོག་ལ་ཕྱིན་པ་མ་གཏོགས༌། ཆོས་ཕྱོགས་ཀྱི་རྩོམ་རིགས་སྐྱོ་བོ་ཆགས་འདུག དེའི་ཐོག་ལ་ཁྱོད་ཀྱི་བསམ་བློ་བཏང་ནས་རྗེས་མ་གང་ལ་ཕྱིན་ཀྱང༌།སཾ་སྐྲཊ་དང་པ་ལི་སྐད་བསླབ་ན་ཕན་ཐོགས་པ་འདུག རྩོམ་རིག་དེ་ང་ཚོས་ཆོས་ཀྱི་ལྟ་བ་མཐོ་བོ་དང་དམའ་བོ་གཉིས་ཀྱི་ཐོག་ནས་གོ་རྟོགས་འཕེལ་བར་ཞེ་དྲག་ཡག་པོ་འདུག དེ་སེམས་ལ་བཞག་རོགས༌། ང་ལ་གསུངས་སོང༌།དྲང་བོ་བཤད་ན་དེ་དུས་ངས་ཤེས་ཀྱི་ཡོད་པ་མ་རེད། རིག་གནས་ཟེར་དུས་ང་ཚོས་སུམ་རྟགས་དང་སྙན་ངག་མ་གཏོགས་མཐོང་གི་ཡོད་མ་རེད། གང་ལྟར་ག་རེ་ཡིན་ན་མིན་ན་དགེ་འདུན་ཆོས་འཕེལ་ལགས་ཀྱི་དགོངས་པ་བཞེས་སྟངས་ཏེ་བོད་སྤྱི་ལ་དཔེ་མི་སྲིད་པའི་དགོངས་པ་རྒྱུ་ཆེན་པོ་རེད། འདི་ངས་བརྒྱ་ཆའི་བརྒྱ་ཐམ་པ་བཤད་ཐུབ་ཀྱི་ཡོད།ཆོས་ཕྱོགས་ནས་བཤད་ན། མི་མང་པོས་དགེ་འདུན་ཆོས་འཕེལ་ལགས་གུང་ཁྲན་རེད་ཟེར་གྱི་ཡོད་པ་རེད། དེ་ཁྱོན་ནས་མ་རཻད། མི་མང་པོས་དགེ་འདུན་ཆོས་འཕེལ་ལགས་རྙིང་མ་རེད་ཟེར་ནས་དགེ་ལུགས་པས་སྐྱོན་བརྗོད་བྱེད་ཀྱི་ཡོད་རེད། རྩ་བ་ནས་མ་རེད། ཡིན་ནའང་ཁོང་ལ་ལྟ་བ་ཞིག་ཡོད་པ་རེད། ཁོང་གི་ལྟ་བ་དགོངས་སྟངས་ང་ཚོས་ཚོད་འཛིན་ཐུབ་ཀྱི་མི་འདུག དེ་དུས་དགེ་འདུན་ཆོས་འཕེལ་ལགས་ཀྱི་ལྟ་བ་དེ་འགྲིག་གི་རེད་མ་རེད་ཟེར་བ་དེ་ང་ཚོས་ལབ་ཐུབ་ཀྱི་མརེད། དེ་ཁོ་རང་ཁོ་རང་གི་ལྟ་བའི་ཐོག་དགོངས་པ་ཞིག་ཡོད་ཀྱི་རེད། མ་གཞི་ངས་དགེ་ངདུན་ཆོས་འཕེལ་ལགས་ཀྱི་ལྟ་བའི་སྐོར་ཞུ་ཤེས་ཀྱི་མི་འདུག ཁོང་གི་ལྟ་བའི་དགོངས་པ་དེ་ནི་ཕྱི་རོལ་བའི་ལྟ་བ་ནི་མ་རེད། ང་ཚོས་འཆར་ཅན་བཤད་བསྡད་པའི་ནང་བའི་ལྟ་བ་དང་ཕྲན་ཙམ་མི་འདྲ་བར་ཁོང་གིས་ཕྱི་ནང་གཉིས་ཀྱི་ལྟ་བ་ཡག་པོ་མཁྱེན་སྟབས། ཁོ་རང་ཁོ་རང་གི་དགོངས་ཚུལ་ཞིག་བྱས་ནས་དེ་ང་ཚོ་བོད་པ་མང་པོ་ཞིག་གིས་ཧ་མ་གོ་བར་ལུས་ནས་བསྡད་པ་ཡིན་པ་འདྲ་བསམ་གྱིན་འདུག
དཔལ་ལྡན་རྒྱལ། རིན་པོ་ཆེས་ ༡༩༩༥ ལོར་རྡ་རམ་ས་ལར་ཨ་མྱེས་རྨ་ཆེན་བོད་ཀྱི་རིག་
གཞུང་ཞིབ་འཇུག་ཁང་གིས་གོ་སྒྲིག་བྱས་ཏེ། བོད་ཀྱི་རྒྱལ་ཡོངས་རྩོམ་པ་པོའི་ཚོགས་ཆེན་དང་པོ་འཚོགས་དུས། རིན་པོ་ཆེ་ཡིས་དགེ་འདུན་ཆོས་འཕེལ་བཙོན་ཁང་ནས་ལྷོད་དུས་བར་སྐོར་ནང་དུ་མཇལ་སོང་གསུངས་བ་ཞིག་དྲན་གྱི་འདུག དེ་དུས་དགེ་འདུན་ཆོས་འཕེལ་ལ་མཇལ་སྐབས་ཁོང་གི་བཟོ་བལྟ་ག་འདྲ་ཞིག་ཆགས་ཡོད་པ་དང་ཚོར་སྣང་ག་རེ་བྱུང་སོང༌།
རག་ར་རིན་པོ་ཆེ། ཚོར་བ་དཔེ་མི་སྲིད་པའི་སྐྱོ་བོ་བྱུང༌། ངས་དགེ་འདུན་ཆོས་འཕེལ་ག་དུས་བཙོན་ཁང་ནས་ཐར་ཡོང་བསམ་ནས་བསྡད་ཡོད་པ་རེད། ཉིན་ཞིག་ཧོར་ཁང་དགེ་བཤེས། དགེ་འདུན་ཆོས་འཕེལ་གྱི་གྲོགས་པོ་ཡོད་ན་མེད་ན་རེད། ཁོང་གིས་ང་ལ་ལན་སྐྱེལ་བྱུང༌། དགེ་འདུན་ཆོས་འཕེལ་བཙོན་ཁང་ནས་ཐར་བྱ་ཟེར་གྱི་འདུག གང་དུ་བཞུགས་འདུག་ཟེར་དུས། འདི་བ་བཞུགས་འདུག་ཟེར། ང་སང་ཉིན་དེ་རང་ལ་མཇལ་དུ་ཕྱིན་པ་ཡིན། མཇལ་དུ་ཕྱིན་དུས་ཉིན་གུང་ཙམ་རེད། བཙོན་ཁང་ནས་ཐར་ནས་ཉིན་གཉིས་གསུམ་མ་གཏོགས་སོང་ཡོད་པ་མ་རེད། ཁོང་གི་སྐུ་མདུན་དུ་ཨ་མདོ་བ་ཁ་ཤས་འདུག དགེ་འདུན་ཆོས་འཕེལ་གྱི་ཞལ་རས་སྐྱོ་བོ་དང༌། དབུ་སྐྲ་ཕལ་ཆེར་དཔུང་པའི་སྒང་སླེབས་ཡོད་པ་དང༌། ན་བཟའ་མདོག་སྐྱ་སྨུག་དེ་འདྲ་ཞིག་མཆོད་ཤག དེར་ཨ་མདོ་བ་གསུམ་བཞི་ཞིག་འདུག དེ་ནས་ང་ཡར་ཕྱིན་ལམ་སེང་ཕྱག་འཚལ། འཁྱུག་ཙམ་ལ་ང་སྐད་ཐོན་མ་སོང༌། དེ་ནས་ངས་འདི་ལྟར་ཞུས་པ་ཡིན། དགེ་འདུན་ཆོས་འཕེལ་ལགས་བར་ལམ་སྐུ་ཉེས་པོ་བྱུང་སོང༌། དེ་མ་གཏོགས་ཁ་ནས་ཐོན་མ་སོང༌། འཁྱུག་ཙམ་ཁོང་གིས་གང་ཡང་གསུང་གི་མི་འདུག དེ་ནས་ཁོང་གིས་ཤོག་གུ་ཐེབས་ཅག་ཞིག་གི་སྒང་རྗེ་བཙུན་སྒྲོལ་མའི་སྐུ་ཞིག་བྲིས་འདུག་པ་དེ་བསྟན་ནས། འདི་ཡིན་ད། ང་རང་བཙོན་ཁང་ནང་དུ་བསྡད་དུས་སེམས་སྐྱོ་དུས་སྐྱོ་རོགས་འདི་ཡིན། ང་བཙོན་ཁང་ནང་བསྡད་རིང་སྒྲོལ་མ་འབུམ་གཅིག་ཉུང་མཐར་ཡང་བཏོན་ཡོད་གསུངས་གྱི་འདུག དེ་ནས་མང་པོ་ཞུ་ཐུབ་མ་སོང༌། རྗེས་ནས་དགེ་འདུན་ཆོས་འཕེལ་ལགས་ལ་ཐུགས་རྗེ་གཟིགས་ང་ད་དུང་བསྐྱར་དུ་མཇལ་གྱི་ཡིན་ཞུས་པ་ཡིན། ང་ལ་ཐུག་མ་བདེ་བ་མི་འདུག་གམ་གསུངས་ཀྱི་འདུག ང་མ་བདེ་བ་གང་ཡང་མི་འདུག་ཞུས་པ་ཡིན། དེ་ནས་ཟླ་བ་ཁ་ཤས་རྗེས་ཉིན་ཞིག་ང་ཕར་འགྲོ་དུས་དགེ་འདུན་ཆོས་འཕེལ་ལགས་ཨ་མདོ་བ་གཉིས་དང་མཉམ་དུ་ཕེབས་ཀྱི་འདུག ཁོང་གི་དབུ་ཞྭ་མཆོད་འདུག ལམ་སེང་ཁོང་གིས་ང་ལ་མི་ཟེར་བ་འདི་སྐྱོ་བོ་ཆགས་དུས་གྲོགས་པོ་ཚང་མ་རྒྱང་ནས་བྲོས་འགྲོ་གི་འདུག་ཟེར། ངས་དགེ་འདུན་ཆོས་འཕེལ་ལགས་ལ་ཐུགས་རྗེ་གཟིགས་ང་དེ་འདྲའི་རྩ་བ་ནས་མིན། ཐུགས་རྗེ་གཟིགས་ཡང་ནས་ཡང་དུ་བཅར་གྱི་ཡིན་ཞུས་པ་ཡིན།
དཔལ་ལྡན་རྒྱལ། དེའི་རྗེས་ནས་དགེ་འདུན་ཆོས་འཕེལ་ལ་མཇལ་རྒྱུའི་གོ་སྐབས་རག་སོང༌ངམ།
རག་ར་རིན་པོ་ཆེ། དེ་ནས་ཐེངས་གཉིས་མཇལ་སོང༌། དེ་དུས་དགེ་འདུན་ཆོས་འཕེལ་ལགས་ལ་ཐུགས་རྗེ་གཟིགས་རྒྱ་གར་ལ་ཕེབས་རོགས་གནང་ཞུས་པ་ཡིན། འདིར་བཞུགས་ན་ཆོད་མི་འདུག ལྷ་ས་རུ་མ་བཞུགས་རོགས་གནང༌། རྒྱ་གར་ལ་ཕེབས་རོགས། དེ་དུས་ང་རང་ཡང་རྒྱ་གར་ལ་འགྲོ་གྲབས་ཡོད། དགེ་འདུན་ཆོས་འཕེལ་ལགས་འདིར་བཞུགས་ན་ཕྱག་ལས་གང་ཡང་ཡོང་བའི་བཟོ་བལྟ་མཐོང་གི་མི་འདུག ང་རང་ཡང་རྒྱ་གར་ལ་འགྲོ་རྩིས་ཡོད། རྒྱ་གར་ལ་ཕེབས་རོགས་གནང་ཞུས་པ་ཡིན། འགྲོ་རྩིས་ཡོད་ཟེར་བ་མ་གཏོགས་གཞན་གང་ཡང་གསུང་གི་མི་འདུག ང་ཚོའི་རེ་བར་ཡང་ཕེབས་ན་བསམ་སོང༌། དེ་འདྲ་ཞིག་རེད། དེ་མིན་ལོ་རྒྱུས་འདྲ་བོ་ཙག་ཙིག་མང་པོ་ཞིག་ཡོད་དེ་དག་ཞུས་ཚར་གི་མ་རེད།
དཔལ་ལྡན་རྒྱལ། དགེ་འདུན་ཆོས་འཕེལ་མཆོག་དགོངས་པ་རྫོགས་དུས་རིན་པོ་ཆེ་རྒྱ་གར་དུ་བཞུགས་ཡོད་པ་འདྲ། སྐབས་དེར་ཧོར་ཁང་དགེ་བཤེས་ཀྱིས་རིན་པོ་ཆེར་ཕྱག་ཡིག་ཞིག་ཕུལ་དུས༌། དགེ་འདུན་ཆོས་འཕེལ་མཆོག་དགོངས་པ་རྫོགས་ཡོད་པ་ཐོས་པ་རེད། ཕྱག་ཡིག་དེའི་ནང་དགོངས་པ་རྫོགས་པའི་གནས་ཚུལ་མ་གཏོགས་གནས་ཚུལ་གཞན་བཀོད་ཡོད་དམ། སྤྱིར་དགེ་འདུན་ཆོས་འཕེལ་གྱིས་བོད་ཀྱི་རིག་གཞུང་སེམས་ཁྲལ་དང་ཕྱག་ལས་མང་པོ་གནང་ཡོད་པ་དང༌། རིན་པོ་ཆེ་དང་དགེ་ཆོས་བར་ལ་དགེ་སློབ་ཀྱི་འབྲེལ་བ་ཡོད་པ་རེད། དགེ་ཆོས་དགོངས་པ་རྫོགས་་སོང་ཟེར་བ་ཐོས་སྐབས་སེམས་སུ་ཚོར་བ་ག་འདྲ་ཞིག་བྱུང་སོང༌།
རག་ར་རིན་པོ་ཆེ། ང་ཚོར་བ་ཁྱད་མཚར་བོ་ཞིག་བྱུང་སོང༌། ཧོར་ཁང་ཇོ་ལགས་ཀྱི་ཡི་གེ་དེ་མ་འབྱོར་གོང་ལ་རྨི་ལམ་ཞིག་བཏང་སོང༌། ད་དེང་སང་མི་ཚོ་གནས་ཚུལ་འདི་དང་མཐུན་གི་མི་འདུག དགོང་མོ་འཛམ་གླིང་རིལ་རིལ་ཡིན་པ་ཟླ་དཀར་འདྲ་བོ་སྨུག་པ་འདྲ་བོ།སེམས་སྐྱོ་བོ་ཞིག་འདུག དེའི་སྒང་ལ་དགེ་འདུན་ཆོས་འཕེལ་ལགས་དང་ངེད་གཉིས་འདུག དགེ་འདུན་ཆོས་འཕེལ་ལགས་ཀྱིས་ང་ག་དུས་ཡིན་ཡང་སྐུ་ཞབས་གསུངས་ཀྱི་རེད། ཁོང་གིས་སྐུ་ཞབས་བལྟས་དང༌། ང་ཟླ་དཀ ར་ཕར་ཕྱོགས་སུ་འགྲོ་རྒྱུ་ཡིན། ཟླ་དཀར་ཕར་ཕྱོགས་དེ་འཛམ་གླིང་ཕར་ཕྱོགས་ཡིན་པ་ཏན་ཏན་བཤད་རྒྱུ་མི་འདུག གང་ལྟར་རིལ་རིལ་གཞན་དེ་ལ་འགྲོ་རྒྱུ་ཡིན་གསུངས་སོང༌། ཁྱད་མཚར་དེ་ལ་སྨུག་པ་འཐིབས་འདུག་པ་བལྟ་དུས་ང་རང་ཡང་སེམས་སྐྱོ་བོ་ཞིག་བྱུང་བ་དང༌། དེའི་ཕྱི་ཉིན་ཡིན་ན་ནངས་ཉིན་ཡིན་ན། ཧོར་ཁང་ཇོ་ལགས་གི་ཡི་གེ་འབྱོར་སོང༌། དགེ་འདུན་ཆོས་འཕེལ་དགོངས་པ་རྫོགས་སོང༌། ཁོ་རང་སྐུ་ཞེ་དྲག་བསྙུང་བྱུང༌། དགེ་འདུན་ཆོས་འཕེལ་ལ་སྙུང་བཞེས་དུས་ཟླ་བ་བཟང་པོས་གཟན་འོག་ཏུ་བཞེས་རག་ཁྱེར་ཡོང་གི་འདུག། ང་ཚོས་དེ་ལྟར་མ་བྱེད་ཞེས་བཤད་པ་ཡིན། ཁྱོན་ནས་ཉན་གྱི་མི་འདུག དེ་ལྟར་སྐུ་གཟུགས་སྐྱོ་བོ་བྱས་ནས་གྲོངས་སོང༌། དགོངས་པ་མ་རྫོགས་གོང་ལ་འདི་འདྲ་ཞིག་གསུངས་སོང༌། སང་ཉིན་ནངས་ཉིན་དགོངས་པ་རྫོགས་པ་ཡིན་ན་རྟེན་འབྲེལ་བསྟོད་པ་སྐྱོར་རོགས་གསུངས་ཤག དེ་ནས་གསན་གྱིན་གསན་གྱིན་དགོངས་པ་རྫོགས་སོང་ཟེར་བ་ཞིག་གསུངས་ཤག རྣམ་ཐར་གཞན་པ་ཞིག་གི་ནང་མ་མཐུན་པ་ཅུང་འདུག་བདེན་པ་སུ་ཡིན་མིན་ངས་ཧ་གོ་གི་མ་རེད།
དཔལ་ལྡན་རྒྱལ། རིན་པོ་ཆེ་ལ་དྲི་བ་མཐའ་མ་ཞུས་ཀྱི་ཡོད། དགེ་འདུན་ཆོས་འཕེལ་མཆོག་དུས་རབས་འདིའི་ནང་དུ་ང་ཚོའི་བོད་ཀྱི་རིག་གཞུང་དང་བོད་ཀྱི་རྩོམ་རིག་སྐོར་ལ་མཛད་རྗེས་ཆེ་ཤོས་ཀྱི་མཁས་དབང་ཞིག་རེད། བརྩམས་ཆོས་ཀྱང་མང་པོ་ཞིག་ང་ཚོ་མི་རབས་རྗེས་མ་རྣམས་ལ་ལག་སྐྱེས་ཚུལ་དུ་བཞག་ཡོད་པ་རེད། དགེ་འདུན་ཆོས་འཕེལ་མཆོག་གིས་ང་ཚོའི་བོད་ཀྱི་རྩོམ་རིག་ལོ་རྒྱུས་ནང་ལ་མཛད་རྗེས་ག་འདྲ་ཞིག་བཞག་ཡོད་པ་ངོས་འཛིན་གནང་གི་ཡོད།
རག་ར་རིན་པོ་ཆེ། རྩོམ་རིག་སྒང་ལ་དཔེ་མི་སྲིད་པའི་མཛད་རྗེས་ཆེན་པོ་རེད། དགེ་འདུན་ཆོས་འཕེལ་ལགས་ཀྱིས་རྩོམ་རིག་སྒང་མཛད་རྗེས་ཆེན་པོ་ཡིན་པ་དེང་སང་བོད་ནས་ཕེབས་པ་མང་པོ་ཡོད་པ་རེད། འདི་ཕྱོགས་རྒྱ་གར་དུ་ཡོད་པ་དེ་ཚོ། ང་རྒྱ་གར་ལ་ལོ་གཉིས་ཙམ་ལ་དཔེ་ཆ་ཁྲིད་དུ་ཕྱིན་པ་ཡིན། ཚང་མས་དགེ་འདུན་ཆོས་འཕེལ་ལགས་ཀྱི་དགོངས་པ་ག་འདྲ་ཡོད་པ། བསམ་བློ་གཏོང་སྟངས་ག་འདྲ་ཡོད་པ་སྐད་ཆ་འདྲི་གི་འདུག དགེ་འདུན་ཆོས་འཕེལ་གྱིས་གནང་བའི་ཕྱག་ལས་དེབ་གསུམ་མ་གཏོགས་ཡོད་པ་མ་རེད་དེ། དེའི་ཐོག་ནས་མི་དེ་ཚོའི་ཁོང་ནང་བཞིན་བྱེད་དགོས་པ་དང༌། ང་ཚོའི་ལས་ཀ་གསར་བ་ཡིན་ན་བོད་ཀྱི་རིག་གནས་དང་བོད་ཀྱི་ཤེས་རིག་ཐོག་བྱེད་དགོས་པ་རེད་ཟེར་བའི་སེམས་ཤུགས་ཚང་མ་སླེབས་འདུག འདི་ནི་ངས་རང་དགར་བཤད་པ་མིན། དེང་སང་བོད་ནས་འབྱོར་བ་ཡིན་ན། རྒྱ་གར་ནང་ཡོད་པ་ཡིན་ན། ཚང་མས་རིག་གནས་ཐོག་ཡར་རྒྱུས་གཏོང་གི་ཡིན་ཟེར་བའི་སྐད་ཆ་ཞིག་ཡོད་པ་རེད། དེ་ག་དུས་བཤད་ན་དགེ་འདུན་ཆོས་འཕེལ་ལགས་ཀྱིས་གསུངས་པའི་ཐོག་ལ་སླེབས་ཡོང་གི་འདུག། དེར་བརྟེན་དགེ་འདུན་ཆོས་འཕེལ་ལགས་ཀྱིས་བརྩམས་ཆོས། ཐ་ན་འདོད་པའི་བསྟན་བཅོས་ཡན་ང་ཚོས་བདག་པོ་རྒྱག་དགོས་པ་ཞིག་དང༌། ཁོང་གིས་དཀའ་ལས་བསྐྱོན་པ་བར་སྐབས་ཚིགས་བཅད་གཅིག་ཡིན་ནའང་བདག་པོ་རྒྱག་དགོས་པ་ཞེ་དྲག་གནད་འགག་ཆེན་པོ་རེད།
དཔལ་ལྡན་རྒྱལ། དུས་རབས་འདིའི་ནང་དུ་བྱུང་བའི་མཁས་དབང་ཆེན་པོ་དགེ་འདུན་ཆོས་འཕེལ་མཆོག་གི་སྐུ་ཚེ་དང་ཁོང་གི་བརྩམས་ཆོས་སྐོར་ལ་དེང་སང་སིད་སི་གནས་བཞུགས་རག་ར་རིན་པོ་ཆེ་ཡིས་ང་དང་མཉམ་དུ་བཀའ་མོལ་གནང་བར་ཐུགས་རྗེ་ཆེ་ཞུ།
རག་ར་རིན་པོ་ཆེ། ཡ ལགས་སོ། ཐུགས་རྗེ་ཆེ་གནང༌།