ཁྱེད་ཀྱི་གནས་ཡུལ་ནི།  མདུན་ཤོག > རྒྱུན་ཤེས།

བོད་ཀྱི་གདོད་མའི་རིག་གནས་ལས་འཕང་ལོ་དང་འཕང་ཤིང་ཕོ་མོ་མཚོན་དོན་དུ་འགྲོ་བ་ཇི་ལྟར་འགྲེལ་བཤད་རྒྱག་དགོས།

སྤེལ་དུས། 2013-09-15 11:37:56  ཁུངས། ངེད་དྲ་བ།  རྩོམ་པ་པོ། ཤེས་རིག་གླིང་།  རྡེབ་ཚད། 

གནའ་བོའི་ཆོ་ག་རྣམས་སུ། སྟང་གི་སྲོག་མདའ་ཉ་མིག་དང་།དབྱལ་གྱི་གསེར་འཕང་གཡུ་ལོ་གཉིས།  དང་བོ་སྐྱེས་པ་སོ་སོར་སྐྱེས།བར་དུ་སྨིན་པ་སོ་སོར་སྨིན།ཐ་མར་བསྡུས་པ་གཅིག་ཏུ་བསྡུས།བཅོལ་ལོ་ལྷ་ལ་བཅོལ། བཏགས་སོ་ལྷ་ལ་བཏགས། ཞེས་དང་།  ཕོ་སྲོག་དེ་ནི་མདའ་ལ་བརྟེན།མོ་སྲོག་དེ་ནི་འཕང་ལ་ བརྟེན།མདའ་འཕང་གཉིས་ནི་ལྷ་ལ་བཅོལ།མདའ་འཕང་དེ་ནི་མ་འབྲལ་ཅིག། ཅེས་གསུངས་པ་ལྟར།   སྐབས་འདིར་མདའ་ཞེས་པ་འཕང་ཤིང་ལ་མདའི་བཟོ་དབྱིབས་ཡར་ལྡན་དུ་ཚང་བ་རྟོགས་སླ་ལ།   འཕང་ཤིང་སྟེ་མདའ་མོ་ནི་ཕོ་ལས་ཀྱི་གཙོ་བོ་ཡིན་པས་ཕ་རྒྱུད་ཆོ་རིགས་མཚོན་བྱེད་དང་།  འཕང་ཞེས་པ་ཤིང་རྟའི་འཕང་ལོ་ལྟ་བུར་དཔྱད་ན་འཁོར་ལོ་ལ་གོ་བ་ལྟར།  འཕང་ལོ་ལ་བྱ་བས།  འཕང་ནི་མོ་ལས་ཀྱི་གཙོ་བོ་ཡིན་པས་མ་རྒྱུད་ཆོ་འབྲིང་མཚོན་བྱེད་དུའང་འགྲོ་ལ།  འཕང་ཤིང་དེ་འཕང་ལོར་སྤྲད་པ་ནི།  ཕྱོགས་    གཅིག་ནས་ཕོ་མོ་མཐུན་འཇུག་གི་གཉེན་སྒྲིག་དང་།  གཉིས་ནས་ཁྱོ་ཤུག་གི་མཐུན་སྒྲིལ་མཚོན་པར་མ་ཟད།  གཞན་ཡང་འཕང་ནི་རྩིད་སྐུད་འཁེལ་བྱེད་ཡིན་པས།  རྩིད་སྐུད་ཀྱིས་དུད་ཁྱིམ་མགོ་སྦྲ་བཟོས་ཏེ།  གཞིས་ཁྱིམ་གཅིག་གི་ནང་དགའ་སྐྱིད་དཔལ་ལ་རོལ་བར་ཡང་མཚོན་ནོ། གཞན་ཡང་བོད་ཀྱི་གདོད་མའི་ཡུལ་སྲོལ་དང་སྦྱར་ཏེ།  མདའ་ནི་སྐྱེས་པའི་སྲོག་ཚབ་དང་།  འཕང་ནི་བུད་མེད་ཀྱི་སྲོག་གླུད་དུ་གཏོང་བ་འདོན་ཆོག་རྣམས་སུ་མང་སྟེ།   ཀརྨ་ཆགས་མེད་ཀྱི་གཏོ་ཆོག་ལས།  མདའ་བཀྲ་སྐྱེས་པ་སྟག་ཆས་བརྒྱ།གཅིག་  ལས་བརྒྱ་སྟོང་དུ་མ་འཕྲོ།སྐྱེས་པ་ཕོ་ཡི་གླུད་དུ་འབུལ།འཕང་བཀྲ་མོ་བཙུན་གསེར་གཡུས་བརྒྱན།གཅིག་ལས་བརྒྱ་སྟོང་དུ་མ་འཕྲོ།ཟ་མ་མོ་ཡི་གླུད་དུ་འབུལ།ཞེས་སོ།
ཁྱད་པར་དུ་མདའ་མོ་ལ་མཚོན་ན་གཉེན་སྲོལ་གྱི་སྐབས་སྤྱོད་སྒོ་མང་སྟེ།  དཔེར་ན།  ཡུལ་ལུང་འགར་  མཚོན་ན། ལྷ་མདའ་སྒྲོ་དཀར་དང་།  ཚེ་མདའ་ཉ་མིག  དཔལ་མདའ་གསུམ་ཡོད་ལ།  ལྷ་མདའ་སྒྲོ་དཀར་ནི།  འགོ་བའི་ལྷ་ལྔའི་རྟེན་དང་།  ཚེ་མདའ་ཉ་མིག་ནི།  ཁྱོ་གའི་མདའ་སྟེ་ཕོ་མཚོན་བྱེད་དང་།  དཔལ་མདའ་ནི།  མནའ་མའི་ཕས་གནས་རྫོང་དུ་ཕུལ་བ་ཡིན་པས་གཡང་རྟེན་ཡང་ཡིན་ནོ།
དེ་ལས་གཞན་གནའ་མིའི་ངག་རྒྱུན་དུ།  གཉེན་ལམ་མདའ་ཡིས་ཕྱེ།  ཞེས་པ་ལྟར།  གླིང་སྒྲུང་རྟ་རྒྱུགས་དཔྱིད་ཀྱི་ཉི་མ་ལས།  གླིང་ཡུལ་སྟོད་སྨད་བར་གསུམ་གྱིས་འབྲུག་མོའི་སྐྲ་བདག་རྩོད་སྐབས།  སེང་ལྕམ་  འབྲུག་མོས་ལྷ་མདའ་དར་གྱིས་བརྒྱན་པ་དེ་འཕངས་ནས་ཇོ་རུའི་སྟེང་དུ་ཁྲ་སྤུངས་སེ་བབས་པར་བཤད་པ་དང་།  ཡང་བུ་མོའི་སྣང་སའི་རྣམ་ཐར་ལས།  རི་ནང་དཔོན་པོས་བཙན་དབང་ལ་བརྟེན་ནས་བུ་མོ་སྣང་ས་ལ་གཡུ་དང་མདའ་དར་གྱིས་བརྒྱན་ཏེ་གཉེན་རྟགས་བརྒྱབ་པའི་སྐོར་བཤད་པ་བལྟས་ནའང་མདའ་ནི་གཉེན་རྟགས་ལ་བེད་སྤྱོད་གཏོང་བ་མཐོང་ཐུབ་བོ།