ཁྱེད་ཀྱི་གནས་ཡུལ་ནི།  མདུན་ཤོག > རྒྱུན་ཤེས།

བསེ་རག་ཞེས་པ་ནི་ག་འདྲ་ཞིག་ཡིན་པ་དང་གནོད་པ་ཇི་འདྲ་སྐྱེལ་བ་རེད།

སྤེལ་དུས། 2013-09-15 11:42:09  ཁུངས།   རྩོམ་པ་པོ།   རྡེབ་ཚད། 

   རཱ་ག་ཨ་སྱའི་གཏོར་འབུམ་ལས།  བསེ་རག་རི་ཞོན་སྤུན་དགུའི་ཚོགས།། ཞེས་དང་།  མདོས་གླུད་ཞེ་དགུ་མ་ལས། བསེ་རག་མི་ཡི་རྒྱལ་བོ་ནི།གཞོན་ནུ་དཔལ་སོགས་སྤུན་དགུ་བས།ཟས་ནོར་རྣམས་ལ་གནོད་འཚེ་བྱེད།བསེ་རག་འགོང་བོ་མང་བོའི་ཚོགས།ཞེས་པ་དང་མཐུན་ལ།  བསེ་རག་གི་གཟུགས་ནི།  ལོ་གླུད་   འགོང་བོ་དཀར་ཡས་ལན་ཆགས་ཚིམ་བྱེད་ལས།  བསེ་རག་གི་རྒྱལ་བོ་ནི།  མི་ལ་རྒྱལ་བོ་གཞོན་དཔལ་ཞེས་བྱ་བ་དེ།  བུ་ཆུང་མཛེས་པ་གཡུ་རྣ་ཅན། མགོ་ལ་དངུལ་གྱི་ལྕོག་ཞུ་དང་། དར་འཕྲུ་བྱ་ཕོད་ལྡེམས་སེ་ཡོད་པ།  ཤེལ་ཁྲབ་ལུས་ལ་གསོལ་ཞིང་།  སྦ་དམར་གྱི་ཕུབ་ཆུང་རྒྱབ་ཏུ་འཁུར་བ།  འཁོར་གསུམ་སྐེད་ལ་བསྐོར་ཞིང་།  ལག་ན་བདུད་མོའི་རླུང་རྐྱལ་འཛིན་པ།  རི་བོང་སྔོན་མོ་ལ་བཅིབ་ཞིང་།  ཕུ་བོ་ཆེ་འབྲིང་ཆུང་གསུམ་སོགས་བསེ་རག་སྤུན་དགུས་བསྐོར་བ།  བྱ་སྲེག་པ་བདུན་ནི་ཀླད་ན་ལྡིང་བའོ།རང་ཅག་གིས་མི་ལ་ཙེ་ཙེ་ཟེར་   བའང་འདི་ཡིན་ནོ།།  འདིས་བྱེད་ལས་ནི།  གཏོ་ཆོག་དེ་ལས།  ཁྱད་པར་འབྲས་བུ་ལོ་ཏོག་ལ།བར་དུ་    གཅོད་ཅིང་གནོད་བྱེད་པའི།བསེ་རག་ལྟོགས་འདོད་རྣམས་ལ་བསྔོ།ཞེས་པ་ལས་ཤེས་སོ།
ཡང་ཀརྨ་ཆགས་མེད་ཀྱི་འདྲེ་དགུ་སྐྱས་འདེབས་ལས་མི་ལའི་རྣམ་པ་འདི་འདྲགཞིག་གསུངས་ཏེ།  ཕ་ཙ་ཀ་བྱི་ལ་མགོ་དང་མ་ཅུ་ཏྲ་ཅི་ར་མ་གཉིས་ཀྱི་བུར་འདྲེ་ལ་སྔ་བ་མི་ལ་ཙ་ཏྲ་བྱུང་། དེའི་ལུས་བོ་ཆུ་རུས་ཀེང་  རུས་ཅན་ལ།  ནུ་མ་བསྣུན་པས་བརྣངས་ནས་ཤི།  རོ་དེ་རྒྱལ་བུ་མཐིང་གེའི་མཁར་རྩར་སྦས་བར་བཤད་ལ།  མི་ལ་དེ་ཁྱི་དང་བསྡེབས་པ་ལས་མི་ལ་ཁྱི་གུ།  ཕག་དང་བསྡེབས་པ་ལས་ཕེ་གུ  དེ་ལྟར་མི་ལ་རེའུ་ཚེ།  མི་ལ་ལུ་གུ  མི་ལ་བྱིའུ་ཆུང་།  ཉེལ་ཆུང་།  སྐྱ་ཀ  སྦལ་བ།  རྨོང་ཚེ།  སྲེ་མོང་སོགས་བྱུང་བར་བཤད་དོ།
ཡང་གོང་གསལ་གྱི་རྣམ་པ་དང་མི་མཐུན་པ་ཞིག་ལ།  བསེ་རག་རྫོང་ཐོབ་བསྡུས་པ་ཞིག་ལས།  དབུལ་སྲི་བསེ་རག་ལྟོགས་འགོང་ནི།མི་རྒན་ཉམ་ཐག་སྣོད་སྟོང་ཁུར།བསེ་རག་འབུམ་གྱིས《བྱིས་པ་གཅེར་བུ་དུ་མས་བསྐོར་བ》འཁོར་གྱིས་བསྐོར།ཡོད་ལ་མི་དགའ་མེད་ལ་དགའ།གང་ལ་མི་དགའ་སྟོང་ལ་དགའ། ནོར་སྒྲུབ་བྱེད་ལ་འགབ་འདྲེར་སྡང་།སྣོད་བཅུད་མངའ་ཐང་ཉམས་པར་བྱེད།བློ་ཉེས་ཚོང་ཉེས་མི་ཁ་གཏོང་།བཟའ་ བཏུང་གོས་རྒྱན་སྲིས་ལ་བརྐུ།ཁྱད་པར་ལན་ཆགས་རྗེས་སུ་སྙེགས།ཞེས་གསུངས་པ་དང་། 
བསེ་རག་ཞུགས་པའི་རྟགས་སུ།  ཀརྨ་ཆགས་མེད་ཀྱི་བསེ་རག་བཀར་ཐབས་ལས།  བསོད་ནམས་ཆུང་ བའི་སེར་སྐྱ་འགའ་ཞིག་ལ།ཁྱིམ་དུ་ལྟོགས་འགོང་དབུལ་སྲི་བསེ་རག་ཞུགས།ཁྱིམ་ལ་ཚ་འུབ་དྲོད་མེད་ཤིན་ཏུ་གྲང་།དོན་མེད་འགྲིམ་པ་ཕྱིན་ན་ལྟོགས་སྣང་སྐྱེ།བཟའ་བཏུང་བྱིན་ཀྱང་མི་མགུ་དགའ་སྣང་མེད།གོས་དང་ལུས་མདོག་སྐྱ་ཞིང་བཀྲག་མདངས་མེད།ཕུག་སྲིས་ཟད་མགྱོགས་གློ་བུར་འུད་འུད་ཟད།བཟའ་མི་མི་མཐུན་ནང་འཐབ་ནུབ་འཐབ་བྱེད།བློ་ཉེས་ཚོང་ཉེས་གོད་ཁ་རྒྱུན་མི་ཆད།ལོ་ཐོག་མི་སྐྱེ་སད་སེར་གོད་ཁ་ལྡང་།ཞོ་ལད་ཆང་ལད་འོ་རུལ་མར་མི་ཐོན།ནས་འབབ་མེད་ཅིང་ནོར་ལ་སྐམ་འགོང་ཞུགས།མི་མང་ཟས་ནོར་ལ་སོགས་བགོ་བའི་ཚེ།ཀུན་ལས་ཆུང་ཞིང་ངན་པ་རང་གིས་འཐོབ།གཡོ་བསྐོར་གཟབ་ཅིང་བྱས་ཀྱང་ངན་ཞིང་ལད།རྒྱན་དང་ཤོ་སྐུག་གང་བཞག་མི་ལ་ཤོར།ཅི་བསམ་བྱ་བ་ཐམས་ཅད་ལོག་པར་འགྲོ།བཟའ་བཏུང་མང་དུ་བྱས་ཀྱང་རྒྱག་རྒྱུ་མེད།དེ་དག་བསེ་རག་ལྟོགས་འགོང་ཞུགས་རྟགས་ཡིན།ཞེས་སོ།
རྫོང་འདེབས་ལ་མར་མེ།  འོ་རུལ།  ཞོ་ལད།  ཆང་སྐྱུར།  སྦང་མ།  སྤྲ་བ།  རུས་པ།  ཚྭ་སྒོག་གཡེར་    གསུམ། ཡོས་སྙིགས།  མི་ཕྱུགས་ཀྱི་དྲི་གླུད་ཆངས་བུ་ཟན་རིལ་བརྒྱ་རྩ་བརྒྱད་ལ། འོ་ཆབ་ཀྱིས་བྲན་ཏེ།  ཡོན་བདག་ཕོ་མོ་ངོ་གནག་ཅིང་།  གྲི་བཏོན་ནས་ཧ་ཧ་བརྗོད་ཅིང་།  གཞན་གྱིས་སྐམ་ཡུས་སླ་ང་བརྡུང་ཤིང་རྗེས་ནས་དེད།སྔགས་པས་བདུད་རྩི་འཁྱིལ་བའི་སྔགས་བརྗོད་དེ་གུ་གུལ་དང་རྡོ་ཐུན་གྱིས་བྲབ་ནས་དེད།    ཁང་ཁྱིམ་མི་མཐོང་བའི་སར་རྒྱ་ལམ་ཞིག་ཏུ་འཕང་ནས་རང་དང་བསེ་རག་གི་བར་མེ་ཆུ་རླུང་གསུམ་གྱིས་ ཆོད་པར་སྒོམ་ནས་ཕྱི་མིག་མི་ལྟ་བར་འོང་དགོས་སོ།